Bileran, nanoGUNEko zuzendariak 2024an irekitako bi ikerketa-talde berriak aurkeztu ditu: bata, teknologia terapeutikoen eta diagnostiko aurreratuen alorrekoa, ginekologiaren eta antzutasunaren erronketan espezializatutako irtenbide miniaturizatuak sortuko dituena; eta bestea, erdieroaleen teknologian oinarritutako hardware kuantikoa garatzera bideratua. Bi ildo horiekin, nanoGUNEk bere gaitasunak osatzen ditu hiru arlo estrategikotan erreferente gisa jarraitzeko: nanozientzia kuantikoa, nanomaterialak eta nanomedikuntza.